大家好~~因為掛住煲劇, 都好耐冇寫儍猫日記喇, 今日終於有 d 時間, 就講吓佢地嘅近況啦. 呢排"黃毛仔"(Michael)愛上咗玩廁紙, 一日同我玩幾卷, 真係好頭痛.
事緣係咁嘅, 我早排行街, 見到 d 廁板毛巾公仔套成 set 咁幾靚, 又係我鐘意嘅 snoopy 圖案, 咁咪買咗幾 set 返嚟裝飾吓個 washroom 囉. 話分兩頭, 因為養貓嘅緣故, 驚佢地玩廁所水, 所以一向有個習慣, 就係會將個廁板蓋都放埋落嚟. 因為咁, 當套咗 d 毛巾套之後, 個廁板就變咗一張對貓嚟講------舒服嘅床. 初初我都覺得冇咩問題, 佢地鐘意咪由得佢地响度玩同訓囉, 點知就係咁就出事喇.
佢地可能攤攤下無聊, 咁啱卷廁紙就响佢眼前(如果貓坐响上面, 同佢地成水平高), 哈哈, 啱晒有嘢玩, 又會轉又可以磨爪, 真係一舉兩得呀. 於是日日都玩我幾卷廁紙, 飛到一地紙碎. 鬧極都當耳邊風, 打佢咩, 又好似好可憐咁......好啦, 當我怕咗佢地, 拆番晒 d 廁板套落嚟, 點知佢地已經慣咗, 有冇套都坐上去玩. 咁又算啦, 其他三個 washroom (全屋4個)我都關埋門, 但要留返一個比佢地飲水, 可以想像, 又係咁......
今日終於忍無可忍, 揭起咗塊廁板, 諗住佢地冇得跳上去坐, 一了百了......點知
(
( 聽到一聲水響, 然後見到一隻濕咗大半嘅貓响個 washroom 度衝出嚟, 所經之處全部濕晒 (carpet 呀慘！). 相信大家都估到發生咩事, 佢就係咁死蠢, 無留意個蓋揭起咗, 跳咗落個 toilet bowl 度.....最慘就係佢個 groomer收咗工, 要我自己同佢冲凉, 勞氣呀！>
